धारूर (जि. बीड) : धारूर शहरातील तेली समाज बांधवांच्या वतीने संत शिरोमणी श्री संताजी जगनाडे महाराज यांची पुण्यतिथी श्रद्धांजली व भक्तिभावाने साजरी करण्यात आली. हा कार्यक्रम शहरातील लिंगायत मठात आयोजित करण्यात आला होता. संताजी महाराज हे संत तुकाराम महाराजांच्या काळातील थोर संत असून अभंग गाथेचे प्रमुख लेखक म्हणून ते ओळखले जातात. त्यांच्या जीवनातील भक्ति, समता आणि सामाजिक कार्याची शिकवण आजही समाजाला प्रेरणा देते.

     कार्यक्रमात दत्तात्रय बोरगावकर यांनी संताजी जगनाडे महाराजांच्या जीवन कार्यावर सविस्तर माहिती दिली. त्यांनी महाराजांच्या बालपणापासून ते संत परंपरेतील योगदानापर्यंत अनेक प्रसंग सांगितले. संताजी महाराजांनी भक्तिमार्ग आणि ज्ञानाची गोडी समाजात पसरवली, याचा विशेष उल्लेख त्यांनी केला. उपस्थितांना महाराजांच्या शिकवणीचा आशय समजावा यासाठी त्यांनी सोप्या भाषेत उदाहरणे दिली.

     कार्यक्रमाची सुरुवात संताजी महाराजांच्या प्रतिमेला पुष्पहार अर्पण करून आणि अभिवादन करून झाली. उपस्थित मान्यवरांनी एकेक करून पुष्पहार घालून श्रद्धासुमन अर्पण केले. यावेळी ज्येष्ठ बन्सी सोनटक्के, ज्येष्ठ पत्रकार नागनाथ सोनटक्के, माजी नगरसेवक बाळासाहेब सोनटक्के, दत्तात्रय बोरगावकर, कैलास बोरगावकर, बबन सोनटक्के, शंकर बनसोडे, दत्ता सोनटक्के, अशोक सोनटक्के, ज्ञानेश्वर शिंदे, दशरथ सोनटक्के, सचिन भालेकर, सिद्धू साखरे, गणेश शिंदे, संस्कार व्यवहारे, महेश सोनटक्के यांच्यासह धारूर शहरातील अनेक तेली समाज बांधव मोठ्या संख्येने उपस्थित होते.

     सोहळा साधा पण भक्तिमय वातावरणात पार पडला. अशा कार्यक्रमांमुळे संत परंपरेचा वारसा जपला जातो आणि समाजात एकतेची भावना दृढ होते. तेली समाज बांधवांनी संताजी महाराजांच्या शिकवणीचा प्रसार करण्याचा निर्धार व्यक्त केला. यावेळी उपस्थितांनी महाराजांच्या कार्याला विनम्र अभिवादन केले.