कोल्हापुरात तेली समाजाचा भव्य मेळावा उत्साहात संपन्न !

संत जगनाडे महाराज तीर्थक्षेत्र विकासासाठी १०० कोटींची मागणी; राज्यभरातून तेली समाज बांधवांची मेळाव्याला मोठी उपस्थिती

    सोलापूर: महाराष्ट्र राज्य प्रांतिक तैलिक महासभेच्या वतीने आयोजित करण्यात आलेला तेली समाज मेळावा नुकताच अत्यंत उत्साहात आणि यशस्वीरीत्या संपन्न झाला. या मेळाव्याच्या पूर्वतयारीचा एक भाग म्हणून मंगळवार, दिनांक ४ ऑगस्ट २०२६ रोजी सोलापूर येथे श्री संजय बापू विभुते यांच्या प्रमुख उपस्थितीत श्री अविनाशजी मार्तंडे, श्री किसनराव घोडके, श्री राजकुमार बिज्जरगी सर आणि श्री गुरुपाद कलशेट्टी यांनी तेली समाज बांधवांची एक महत्त्वाची बैठक आयोजित केली होती. या बैठकीत कोल्हापूर येथे होणाऱ्या मुख्य मेळाव्यासाठी समाज बांधवांनी मोठ्या संख्येने सहभागी व्हावे, असे कळकळीचे आवाहन करण्यात आले होते.

    त्यानुसार दिनांक २३ ऑगस्ट रोजी कोल्हापूर येथे महाराष्ट्र राज्य प्रांतिक तैलिक महासभेच्या वतीने महाराष्ट्रासह इतर राज्यांतील तेली समाज बांधवांसाठी एक भव्य मेळावा आयोजित करण्यात आला. या महत्त्वपूर्ण मेळाव्याचे अध्यक्षपद राज्याचे महसूल मंत्री नामदार श्री चंद्रशेखर बावनकुळे साहेब यांनी भूषवले. या मेळाव्यास प्रमुख पाहुणे म्हणून माजी खासदार रामदासजी तडस साहेब, माजी मंत्री विजय वड्डेटीवार साहेब, प्रसिद्ध उद्योगपती भूषणजी कर्डिले साहेब तसेच महाराष्ट्र तेली समाज संघटनेचे कार्याध्यक्ष श्री गजानन शेलार साहेब उपस्थित होते. या सर्व मान्यवरांच्या उपस्थितीत श्री संत जगनाडे महाराज यांच्या प्रतिमेचे विधिवत पूजन करण्यात आले.

    कार्यक्रमाचे प्रास्ताविक श्री संजय बापू विभुते यांनी अत्यंत प्रभावीपणे केले. या समाज मेळाव्यात तेली समाजाच्या हितासाठी एकूण तब्बल अठरा महत्त्वाच्या मागण्या शासनासमोर मांडण्यात आल्या. यातील प्रमुख मागण्यांमध्ये सर्वप्रथम श्री संत जगनाडे महाराज यांच्या सदुंबर येथील तीर्थक्षेत्राच्या सर्वांगीण विकासासाठी शासनाने १०० कोटी रुपयांचा भरीव निधी तातडीने मंजूर करावा, अशी मागणी करण्यात आली. त्याचबरोबर श्री संत संताजी जगनाडे महाराज आर्थिक विकास महामंडळाला अधिकृत मंजुरी देऊन त्यासाठी पुरेशी आर्थिक मदत उपलब्ध करून द्यावी, अशीही आग्रही मागणी करण्यात आली.

    सध्या लागू असलेल्या आरक्षणाबाबतही या मेळाव्यात महत्त्वाचा प्रश्न उपस्थित करण्यात आला. तसेच सुट्या तेल विक्रीवर सध्या लागू असलेल्या कायद्यासंदर्भातही सविस्तर चर्चा झाली. याशिवाय राज्यातील प्रत्येक जिल्ह्यात तेली समाजासाठी स्वतंत्र समाजभवन बांधण्यात यावे, अशी मागणी करण्यात आली. गावोगावी लिंगायत समाजासाठी दफनविधीकरिता आवश्यक जागा उपलब्ध करून द्यावी, तसेच प्रत्येक जिल्ह्याच्या ठिकाणी तेली समाज बांधवांच्या मुलांसाठी स्वतंत्र वसतिगृह उभारण्यात यावे, अशा एकूण अठरा महत्त्वाच्या मागण्या या मेळाव्यात मांडण्यात आल्या.

    आयोजकांच्या वतीने उपस्थित सर्व मान्यवरांचे विशेष स्वागत आणि सत्कार करण्यात आला. यावेळी आपले मनोगत व्यक्त करताना उपस्थित सर्व मान्यवरांनी एकमताने सांगितले की, संपूर्ण समाज संघटित झाल्याशिवाय कोणतीही गोष्ट सहजासहजी साध्य होत नाही. तेली समाजातील मुला-मुलींनी उच्च शिक्षण घेऊन प्रगती साधावी आणि पारंपरिक तेल व्यवसायालाही अधिकाधिक चालना मिळून तो वृद्धिंगत व्हावा, अशी अपेक्षा त्यांनी यावेळी व्यक्त केली. या भव्य मेळाव्यासाठी सोलापूर शहर तसेच जिल्ह्यातील तेली समाज बांधव मोठ्या संख्येने आणि उत्साहाने उपस्थित होते.

    महाराष्ट्र राज्य प्रांतिक तैलिक महासभेचे उपाध्यक्ष श्री संजय बापू विभुते यांच्या समर्थ मार्गदर्शनाखाली आणि कोल्हापूर येथील तेली समाज बांधवांच्या वतीने, राज्यभरातून या मेळाव्यासाठी आलेल्या समाज बांधवांची निवास, अल्पोपहार आणि जेवणाची उत्तम व्यवस्था करण्यात आली होती.

• श्री संजीवकुमार कलशेट्टी, सोलापूर